{"id":4180,"date":"2024-12-03T18:50:44","date_gmt":"2024-12-03T17:50:44","guid":{"rendered":"https:\/\/extremeneria.com\/?p=4180"},"modified":"2024-12-06T16:17:37","modified_gmt":"2024-12-06T15:17:37","slug":"daconteceris-dantanu-leyendas-doganu","status":"publish","type":"post","link":"https:\/\/extremeneria.com\/index.php\/2024\/12\/03\/daconteceris-dantanu-leyendas-doganu\/","title":{"rendered":"D\u2019ACONTECERIS D\u2019ANTA\u00d1U, LEYENDAS D\u2019OGA\u00d1U"},"content":{"rendered":"\n

Celebrando el reciente acuerdo de la Asamblea para declarar el estreme\u00f1u como Bien de Inter\u00e9s Cultural, hoy os traemos este relato de nuestro compa\u00f1ero Fernando V\u00e1zquez S\u00e1nchez, primer premio en la modalidad de extreme\u00f1o del I Edici\u00f3n Nacional Literaria de Microrrelato y Relato Corto sobre Mitolog\u00eda de las Hurdes.<\/p>\n\n\n\n

\"\"<\/figure>\n\n\n\n


D\u2019ACONTECERIS D\u2019ANTA\u00d1U, LEYENDAS D\u2019OGA\u00d1U<\/strong><\/p>\n\n\n\n


31 d\u2019octubri de 1942.
<\/strong>S\u2019enciendi la lumbri.
S\u2019arrejuntan en Cambroncinu unos cuantus hurdanus ven\u00edus de los pueblus d\u2019alreol pa
contarsi historias de mieu. \u00c1n tra\u00edu vinu de pitarra y casta\u00f1as pa hacel carbochis a
hinchapelleju como es costumbri pa festejal. Ma\u00f1ana es Tolosantos y esa nochi, es nochi de
mieu.
Se sientan en unos tajus de corcha con las espaldas sustrib\u00e1s ena par\u00e9 de piedra.
Porcima de las cabezas, a media altura, quea una red d\u2019alambri que sirvi de secaeru pa las
primeras casta\u00f1as que s\u2019an recog\u00edu. El humu que las har\u00e1 pilongas escapa por entre la
rehiendas que dejan las lanchas de pizarra que conforman el tej\u00e1u. S\u2019ah\u00faman con la zorrera
que desprendin las tarmas entov\u00eda a medio ardel y se hablan los unus a los otrus con los ojus
entornaus. Unu con pintas de farraguas \u00e1 apechau la puerta poldentro \u201cpa que no entrin los
malus esp\u00edritus\u201d y s\u2019\u00e1 guardau la llavi anantis de sentalsi bien al fondu del corralinu.
<\/p>\n\n\n\n

\u00bfQui\u00e9n espienza hablandu?
Yo mesmu! – Dici el t\u00edu Aurelio el de Cambr\u00f3n-.
Esta historia que sus vengu a relatal la escuch\u00e9 yo, ya en tiempus, de la propia boca del
dotol Olivera, d\u2019aquel llamau don Eduardo. Ser\u00eda pol mil nuevecientus y veinticincu. Sig\u00fan me
contara, av\u00edan d\u00edu aquella mesma ma\u00f1ana al su consultoriu una madri y un hiju que proven\u00edan
dambus dos de l\u2019Aldiuela (pos \u00e9l atend\u00eda tambi\u00e9n los pueblus de paquel r\u00edu). Sus diba diciendo,
que vinieurun aquellus dos a consultal, con el cuerpu cortau por mediu del propiu mieu,
regilandu como regilan los que tienin el baili de San Vitu, hiporreandu el unu y llorandu con
tantu cuaju la otra que el dotol no atinaba pa vel de entendel-la . Pa\u00e9ci sel que juraban y
perjuraban al meicu que las brujas av\u00edan lleg\u00e1u al pueblu y que en la su casina av\u00edan d\u2019avel
echau alg\u00fan conjuru. Le espricarun que barruntaban ruidus mu rarus, que cantaba la gorulla
sin sel tempor\u00e1, que las cosas se ca\u00edan pal suelu y se las encontraban zale\u00e1s. Hasta una jarrina
de loza con tapaera del ajual de boda de la madri, que usaban pal vinu, les av\u00eda desaparec\u00edu.
Y ten\u00edan tanto mieu que ya no quer\u00edan volvel pall\u00ed acuy\u00e1.

Sus dir\u00e9 tambi\u00e9n, pa centralvus, que era el tiempu de cuandu el sacamantecas hac\u00eda de
las sus barrabas\u00e1s por estas tierras. El t\u00edu del untu av\u00edan dau en mental-lu paqu\u00ed. Av\u00edan apaec\u00edu
ya unas cuantas ni\u00f1as desoll\u00e1s, con el vientri abiertu y con el untu ora arranc\u00e1u ora cortau a
cuchillu. No estaba la cosa pa bromas y el mieu apretaba huerti pa tol mundu.
El dotol, no creyendu la met\u00e1 de lo que o\u00eda -tos sabemus c\u00f3mo era aquel manchegu de
reciu pa las cosas que a \u00e9l le parec\u00edan bob\u00e1s- leh hizu promesa de presentalsi en cuantitu que
pudiera en el pueblu, pa sanal lo que hubiera que sanal, pa ponel orden ondi hubiera que ponellu.
Y asina se volvierun de mala gana pa la su alquer\u00eda aquellus vecinus, a la espera de la visita
que ven\u00edan de prometelis.
El d\u00eda que pudu, hu\u00e9 el dotol parriba en el mulu que le av\u00edan mercau los se\u00f1oris de
Madr\u00ed, aquellus del Patronatu, y al que \u00e9l mentaba como Pantop\u00f3n. El cielu estaba
embara\u00f1au, llov\u00eda a c\u00e1 instanti y hac\u00eda un fr\u00edo d\u2019arrecilsi. Hizu el viaje encurujau en la su capa
con el sombreru hasta el bordi las cejas. Lleg\u00f3 a aquella alquer\u00eda ya bien escurec\u00edu, y, pol mediu
d\u2019aquellus dos probitus que av\u00edan consultao d\u00edas anantis y que debierun d\u2019anuncial la visita del
se\u00f1ol, se rebull\u00f3 tol pueblu al vel-li llegal. Salierun con los candilis pal mediu la praza y s\u2019arm\u00f3
un g\u00fcen bulliciu ondi tol mundu quer\u00eda contal al dotol lo que suced\u00eda dendi algunus d\u00edas:
comida rob\u00e1, cabras degoll\u00e1s, ru\u00edus qu\u2019anantis nunca s\u2019ab\u00edan barruntau\u2026 Y pensarun que \u00e9l
diba a dal soluci\u00f3n a toas aquellas intrigas, pos lo avian vistu anantis ya dal soluci\u00f3n a muchas
otras y le ten\u00edan mucha fe.
Paeci sel que el dotol se plant\u00f3 en mediu la praza y habl\u00f3 asina: \u201cBrujas de l\u2019Aldiuela!
Venil pac\u00e1 si t\u00e9n\u00e9is aveli\u00e1!\u201d -Wenu, to estu con aquel acentu finu que tienin los de pa\u00ed acull\u00e1,
ya me pod\u00e9is entendel-. Diba diciendu: \u201cBrujas de l\u2019Aldihuela o de ondi haig\u00e1is ven\u00edu! Salil de
los esconditis onde vos aigais met\u00edu. Venil a m\u00ed. No sus tengo mieu\u201d. Y diba recorriendo las
callejinas conjurando a las brujas, tontoneando en las puertas, ansomando la cabeza onde
ve\u00eda un buraco, sapeando a los gatus negrus si se pon\u00edan pol mediu. Los candilis le segu\u00edan, y
detr\u00e1s de ellus, las carinas de espantu de los del pueblu. Al no aparecel naidi, diju: \u201cV\u00e9is,
hermanitus? que las brujas no esistin, que no est\u00e1n m\u00e1s que en las vuestras cabezas que a t\u00f3
s\u2019agarran\u201d. Y, no habiendu otrus menesteris que le envaigaran, decidi\u00f3 volvel a la Factor\u00eda ondi
viv\u00eda y av\u00eda de pasal consulta al dia siguienti. Los del pueblu le ped\u00edan que no se huera, que en
cuantitu no estuviera volver\u00edan los maleficius. Con m\u00e1s de tres horas de recorrel regateras y
canchalis a caballu por delanti, decidi\u00f3 dilsi a escapi.
No har\u00eda una hora del caminu de g\u00fcelta encima del mulu cuandu esti, el galanu
Pantop\u00f3n, empez\u00f3 a encabritalsi comu lo haci un mochu preparau pa topeal, y a puntitu estuvu
de embrocal a don Eduardo pal suelu. Seguru que s\u2019aviera esmandilau d\u2019avel ca\u00edu. Tirandu
huerti de las cinchas y d\u00e1ndoli una voz con to su alientu\u2026 \u201cSooooooooooooooo!!!!!!\u201d Consigui\u00f3
dominalu.
Pens\u00f3 el dotol Olivera que se habr\u00edan cruz\u00e1u con una bicha en el caminu. Una culebra
bahtarda de las que anantis s\u2019encontraban a espuertas paqu\u00ed. Mareja bicha s\u2019av\u00edan cruzau!
Pa\u00e9ci sel que se qued\u00f3 el meicu de piedra cuando vio lo que el caballu ya barruntaba, pos de
nochi era, y llovel llov\u00eda, pero a cachus ansomaba una g\u00fcena luna que dejaba vel algu. All\u00ed
estaba aquel sel, mediu ombri mediu animal, que ni siquiera atin\u00f3 don Eduardo a sabel si era
machu o hembra. Contrahechu, encorvau, harapientu, con el pelu rebujau y las u\u00f1as largas y
negras como garras. All\u00ed estaba, -digu- agazapau encima de un amasiju de carni ondi el dotol
pa desgracia de t\u00f3s pudu reconocel el cuerpinu de un ni\u00f1inu o una ni\u00f1ina, abiertu en canal, a
medio desollal, envueltu en sagri, con el untu medio huera. La bestia que agarraba aquel
cuerpinu mir\u00f3 a don Eduardo con los ojus rojus como la sangri fresca que mana del ga\u00f1\u00f3n de
los lichonis en la matanza. Y asina -levanta t\u00edu Aurelio el labiu de un lau pa ense\u00f1al el colmillule
ense\u00f1\u00f3 los dientis afilaus acercandu al su pescuezu la punta de unas hocis herrumientas que
agarraba con la manu, movi\u00e9ndolas de lau a lau, amenazandu con cortali el pescuezu tambi\u00e9n
a \u00e9l.
\u201cSu\u00e9ltala!\u201d Grit\u00f3 don Eduardo. No hubu rispuesta. Cuando se separ\u00f3 del cuerpinu vi\u00f3
dos buracus en el pescuezu con el que la bestia av\u00eda dau en sacal-li la sangri, que sig\u00fan don
Eduardo, av\u00eda ech\u00e1u en una jarrina de loza con tapaera que meti\u00f3 en un bolsu de tela ro\u00eda. Era
tan clara la luna entoncis, que lleg\u00f3 a vel hasta una ramina de madru\u00f1era que ten\u00eda la tapaera
pint\u00e1 encima. La bestia disapareci\u00f3 a escapi y\u00e9ndusi pa lo escuru.
Qued\u00f3 congelau el dotol Olivera. La sangri hel\u00e1 endrentu las venas, con una ansia en
la boca del est\u00f3mago que casi le corta el alientu. Na\u00edta pudu hazel ni pol salval a la ni\u00f1ita ni
pol atrapal a la bestia. Recogi\u00f3 aquel cuerpinu y lo llev\u00f3 Caminomoriscu a la espera que
pudiera venil el ju\u00e9 de instrucci\u00f3n, un tal Gil, que por entoncis s\u2019asentaba en Herv\u00e1s y que
envaig\u00f3 varius d\u00edas pa estas tierras sin dal resolv\u00edu el casu. El t\u00edu del untu s\u2019av\u00eda esfumau.
Dijun los se\u00f1oris Gil y Olivera reconocel en aquel tipu de crimin las recomendacionis
d\u2019alg\u00fan curanderu de los muchus que por entoncis av\u00edan. Algunu bien malu, pos otros curaban
pol mediu de cuatro hierbas coc\u00edas que hac\u00edan bebel a los enfermos, o torviscas que hac\u00edan
arreatalsi, como si fueran pulserinas, a los imped\u00edus. Quer\u00eda el dotol espric\u00e1lselo to pa sus
adentrus pol medio de la raz\u00f3n y la ciencia, y bien sabemus que por estas tierras, la raz\u00f3n no
lo esprica t\u00f3 lo que aconteci. Me diju que sab\u00eda d\u2019algunus curanderus que recomendaban a las
familias que ten\u00edan posiblis sacal la sangri d\u2019alg\u00fan ni\u00f1u en g\u00fcena sal\u00fa pa d\u00e1lsila a bebel a
enfermus en su \u00faltimu alientu. El untu, sig\u00fan \u00e9l, se usaba pa preparal arreatis de sebo pa vel
de cural mil y un malis mal diagnosticaus\u2026
Quisu reconocel don Eduardo en aquella bestia al matanch\u00edn que usaba el curanderu
pa las sus calamidadis y se hizu el propositu de dal una espricaci\u00f3n desti mundu a lo que los
hurdanus daban en vel como cosas de brujas. Un crimin, espantosu, pero un crimin y na m\u00e1s.
La probi ni\u00f1ina muerta\u2026 se supu que era la ni\u00f1a desapaec\u00eda de una alquer\u00eda de paqu\u00ed
cerca horas antis. No ser\u00eda la primera, pero sus dir\u00e9 qu\u2019av\u00eda de sel la \u00faltima hasta el d\u00eda de hoy.
Y las brujas de l\u2019Aldiuela, don Eduardo? -le pregunt\u00e9 yo sig\u00fan me contaba la historia-,
Tieni espricaci\u00f3n pa las brujas? Y no pudu espricalmi don Eduardo, ni con toa la raz\u00f3n de los
estudiosus, las cosas de brujas que ven\u00edan pasandu los d\u00edas antis de tan desgraciau suceso.
Ten\u00eda por seguru que no eran mas que el presagiu de esta desgracia y quiso pensar que eran
los enreos d\u2019aquella bestia pa envahil a las gentis de los pueblus d\u2019alreol en otrus menesteris.
Ya hab\u00eda suced\u00edu otras vecis, unas en Cambr\u00f3n, otras en la Aldihuela, otras en el Robl\u00e9u.
S\u2019espricaba \u00e9l -me dec\u00eda- que el t\u00edu del untu no ser\u00eda m\u00e1s que un probi desgraciau, contrahechu,
que escuchaba lo que ordenaba un curanderu a cambiu de cuatru realis.
Y asina fue c\u00f3mo supu el dotol Olivera en carnis propias que los cuentus de brujas que
no son m\u00e1s que mentiras en otras tierras hablan de realid\u00e1 en Las Hurdis, nienque sea pa dal
un sent\u00edu a los aconteceris y las verdadis que est\u00e1n pasandu ahora mesmu ah\u00ed ahuera. Por esu,
pa los que est\u00e1is escuchandu estas palabras m\u00edas -y ya me callu- solu quiero darus un conseju,
apechal la puerta cuando haga escuru huera. El t\u00edu del untu puedi siguil rondandu, pos nunca
se supu qui\u00e9n hu\u00e9, ni dejarun de pasal cosas de brujas.

Atizan la lumbri con unas estenazas de hierru. Chisporrotean las cepas de parra que
acaban de echal al fuegu. Esplotan los \u00faltimos carbochis.<\/p>\n\n\n\n


Qui\u00e9n cuenta otra historia?<\/p>\n\n\n\n

Yo tengu el cuerpu cortau! \u2013 dici unu- Diba yo a contal una historia, pero m\u2019a quedau
la menti en brancu. Del t\u00edu del untu av\u00eda yo escuchau hablal, pero di en pensal qu\u2019eran
invencionis de pa estus pueblus.
Sabel vusotrus -respondi el t\u00edu Aurelio- que d\u2019aconteceris d\u2019anta\u00f1u nacierun las
leyendas d\u2019oga\u00f1u. Que el mieu de las gentis de paqu\u00ed tiene su raz\u00f3n de sel, dem\u00e1s sabemus
que las brujas y el t\u00edu del untu esistierun y almejol entov\u00eda esistin.
Qui\u00e9n va a contal la pr\u00f3xima? Insisti el t\u00edu Aurelio.
Yo mesmu! Me conozco una que tambi\u00e9n sus va a cuajal la sangri, pero bien cuaj\u00e1.
Hablaba un hombri pelirroju, el que estaba sentau al fondu del corralinu, pero antis de
proseguil, ech\u00f3 un tragu bien largu del vinu que \u00e9l mesmu av\u00eda tra\u00edu y que se oy\u00f3 bajal espesu
ga\u00f1oti abaju. Endispu\u00e9s de bebel, le pusu a la jarrina de loza que tra\u00eda la tapaerina ondi av\u00eda
pint\u00e1 una rama de madru\u00f1era. Segu\u00edu, ense\u00f1andu una media sonrisina que dejaba vel los
dientis te\u00f1\u00edus de colorau, se dispusu a hablal, pero ya naidi le escuchaba.
S\u2019av\u00edan quedau hel\u00e1s las palabras y la sangri a pesal del calol de la lumbri. Se contuvon
las respiracionis. Paralizaus, regilaban de mieu.
A media nochi tocarun las campanas a muertu sin que naidi las estuviera rebuyendu.
<\/p>\n\n\n\n

Fernando V\u00e1zquez S\u00e1nchez.

Bibliograf\u00eda:
Texto inspirado en otros existentes y reales:<\/p>\n\n\n\n